A Policía Local de Poio tramitou durante o ano 2021 un total de 258 dilixencias por delitos
Por Redacción
Un 47% do total de dilixencias abertas por delito por parte da Policía Local de Poio durante o ano 2021 logrouse resolver, mentres que o 53% restante trátase de atestados con autor descoñecido.
É a conclusión do balance realizado polo corpo policial municipal, e que revela que durante o pasado ano tramitaron un total de 258 dilixencias por delitos, dos que 79 foron leves e o resto graves ou menos graves.
Segundo a información da Policía logrouse identificar a 122 persoas como autores destes presuntos delitos, procedéndose á detención de 11 delas. Entre todos os casos nos que se actuou destacan tres delitos por violencia de xénero e outros tres por roubo con forza, ademais de actuar en tres ordes de busca e captura, unha detención por lesións graves e un detido por un delito contra a saúde pública.
Tamén se tramitaron 10 presuntos delitos de violencia doméstica, con dous menores de idade involucrados. Neste sentido tramitáronse durante 2021 ata 8 presuntos delitos ante a Fiscalía de Menores ao non superar os autores a maioría de idade.
As estatísticas reflicten que os delitos con danos (54) foron os máis habituais seguidos dos furtos (45), roubos (40), estafas telemáticas (28), ameazas (26) e seguridade viaria (13).
Durante os próximos meses estes datos sobre o índice de criminalidade en Poio serán avaliados por alumnos do grao de Criminoloxía da UNED, en virtude do convenio asinado coa universidade.