Os escolares do CEIP de Marcón recuperan o Entroido tradicional da parroquia
![](/web/cache/scene/uploads/fotos/foto/8b4/_S7QytKoutjK3UsovKMnMzytWsi62MjKxUipKLc6sStUxMjDQSU_/_7NK0kt0snNTEnJSVWyrgUA_/6218d94707-20220225-patxot-entroido-tradicional-marcon-0435.jpg)
© Mónica Patxot
![](/web/cache/scene/uploads/fotos/foto/a33/_S7QytKoutjK3UsovKMnMzytWsi62MjKxUipKLc6sStUxMjDQSU_/_7NK0kt0snNTEnJSVWyrgUA_/6218d94315-20220225-patxot-entroido-tradicional-marcon-0285.jpg)
© Mónica Patxot
![](/web/cache/scene/uploads/fotos/foto/529/_S7QytKoutjK3UsovKMnMzytWsi62MjKxUipKLc6sStUxMjDQSU_/_7NK0kt0snNTEnJSVWyrgUA_/6218d94564-20220225-patxot-entroido-tradicional-marcon-0339.jpg)
© Mónica Patxot
![](/web/cache/scene/uploads/fotos/foto/c8b/_S7QytKoutjK3UsovKMnMzytWsi62MjKxUipKLc6sStUxMjDQSU_/_7NK0kt0snNTEnJSVWyrgUA_/6218d9465f-20220225-patxot-entroido-tradicional-marcon-0379.jpg)
© Mónica Patxot
![](/web/cache/scene/uploads/fotos/foto/eeb/_S7QytKoutjK3UsovKMnMzytWsi62MjKxUipKLc6sStUxMjDQSU_/_7NK0kt0snNTEnJSVWyrgUA_/6218d949d6-20220225-patxot-entroido-tradicional-marcon-0520.jpg)
© Mónica Patxot
Este venres día 25 de febreiro o alumnado de Infantil e Primaria do CEIP de Marcón (Pontevedra) percorreu os camiños da parroquia vestido de campesiño ao xeito do Entroido tradicional desta zona, e que neste colexio tentan rescatar para pór en valor a historia e costumes do lugar.
"Estamos tentando dende o colexio recuperar unha tradición de antes da Guerra Civil que era o Entroido de Marcón. O Entroido foise localizando nas distintas partes da parroquia, había un na Laxe, en Pintos, na Ermida... Mantivéronse así en auxe ata os anos 70. Despois empezou a decaer, tentaron mantelo ata os 90 pero a partir de aí foi difícil. Logo a Sociedade Antropolóxica Galega intentou recuperalo no 2014 pero non foron quen. E coincidiu que este ano o Concello de Pontevedra está facendo un traballo cos coles 'O teu cole na historia' e a nós nos debuxou Polo Correo do Vento un mural co Entroido tradicional. Entón aos nenos chamoulles moito a atención, preguntaban seguido, e decidimos en vez de traballar os peliqueiros, as madamas e os galáns facelo con noso Entroido", relata a mestra de 1º de Primaria Silvia Puga, quen confesa a súa emoción por recuperar este retallo da historia de Pintos, lugar do que é oriúnda.
A importancia de repoñer esta festa reflectíase na ilusión dos escolares pero tamén nas casas das xentes da parroquia de Marcón polas que os pequenos ían facendo parada para recoller o tradicional agasallo que adoitaba ser un alimento, bebida ou uns pouquiños cartos. No seu lugar, para adaptarse aos tempos pero tamén á situación sanitaria, o claustro do colexio decidiu que o "aguinaldo" fose en forma de alimentos non perecedoiros que despois levarán ao Comedor de San Francisco.
A primeira parada foi na Casa do Outeiro, no lugar de Pumariño, onde Eugenia Pazos recibía feliz aos nenos e aseguraba a PontevedraViva que nos seus 66 anos vivindo no lugar, "desde que nacín, toda a vida", nunca asistira a este Entroido. Na compaña de dúas amigas que teñen fillos escolarizados no CEIP de Marcón agardaba a chegada da comitiva. Deste xeito, Eugenia, a súa sobriña Yolanda e Leonor, amiga da súa filla, cumprían o ritual e facían entrega dun paquete de azucre, galletas, arroz, cola-cao e leite para o comedor benéfico.
A implicación dos veciños arrincou á volta das vacacións do Nadal. Durante dúas semanas, dous irmáns orixinarios de Pintos e que xa pasan dos 70 anos, Fina e Sesito (José) da Casa da Aldana, achegáronse ata o CEIP de Marcón para explicarlles aos escolares todos os detalles que lembraban da tradición, dos tempos nos que seu pai construía con pallas o boneco. Así foi como lles descubriron quen era Entroido, o nome da personaxe protagonista, "que está feito a partir dunha gaia de madeira, unha estaca á que se lle engaden as dúas pernas, vana revestindo con palla de centeo e despois o visten todo elegante con roupa dos labregos, pantalón branco, camisa branca, varios fulares, adornos, e un brazo metido no peto e outro estirado", sinala a mestra Silvia Puga.
A tradición marca que Entroido baile no medio da Compañía, que é como se lle chama á comitiva, que fai soar os axóuxeres cos que van enfeitados e unhas castañolas, que desta volta os escolares de Marcón crearon con materiais de reciclaxe. Os cánticos son variados, sempre a partir da entrada "Que viva". Continúa a melodía con vivas ao Entroido, á Compañía e á Casa na que se vai facendo parada.
Na xornada, os escolares dividíronse en dous grupos. Un co alumnado de maior idade (6º de Primaria) que percorreu a zona concreta do Entroido tradicional, no lugar de Pintos. E outro co alumnado de cursos inferiores que camiñou polos arredores do centro educativo polos lugares de Pazos, A Valadiña, Pumariño e Valadares. Todos atopáronse contra o mediodía no Campo da Festa de Marcón para desfrutar dunha merenda en grupos burbulla.
Recuperación do Entroido tradicional no CEIP de Marcón
O alumnado de Infantil e Primaria do CEIP de Marcón (Pontevedra) percorreu os camiños da parroquia vestido de campesiños ao xeito do Entroido tradicional do lugar de Pintos, que neste colexio tentan recuperar para pór en valor a historia da parroquia
© Mónica Patxot