Axentes da Garda Civil interveñen unha partida de máis de 50 quilos de marisco ilegal no Grove
![Redacción](/web/cache/scene/uploads/xornalistas/foto/_S7QytKoutjK3UsovKMnMzytWsi62MjSxUqrKz891Lsov0DEyAC_/_Il61oA_/506490f5a15ce-c6ku5opwb5qbtijalxd0_reasonably_small.jpeg)
Por Redacción
Máis de 50 quilos de distintas especies de marisco eran interceptados durante a fin de semana cando circulaban de maneira ilegal por estrada no municipio do Grove.
A intervención realizábase cando axentes da Garda Civil pertencentes á Patrulla do Seprona de Pontevedra mantiñan un punto de comprobación de vehículos en colaboración co servizo de Gardacostas da Xunta de Galicia. O control atopábase na estrada PO-316.
Un dos vehículos parado transportaba 52 quilos de bois de mar, tamén 4,35 kg. de lumbrigante e 0,45 kg. de lagosta. Durante a inspección, os axentes comprobaron que o condutor carecía de documentación que acreditase a orixe e a trazabilidade do marisco. Ao non poder amparar legalmente o transporte, o condutor foi denunciado ante a Delegación Provincial da Consellería de Pesca e Asuntos Marítimos, por infrinxir a Lei de Pesca de Galicia.
O transportista denunciado é un veciño de Sanxenxo, de 43 anos de idade. O marisco intervido foi entregado baixo recibo nun centro benéfico de Pontevedra.
A actuación englóbase no marco do Plan Anual de Control Integral de Actividades Pesqueiras (PACIAP), que regula o cumprimento das disposicións da política pesqueira comunitaria e a normativa sectorial vixente. Entre os seus obxectivos atópase a loita contra a pesca ilegal non declarada e non regulamentada, segundo informan desde a Garda Civil.