Detido en Sanxenxo un home de 35 anos por fabricación ilegal de explosivos
Por Redacción
Dentro da operación denominada Boxes-Charada, a Garda Civil detiña no municipio de Sanxenxo a unha persoa e a outras dúas en Pueyo (Navarra), polos delitos de fabricación ilegal de explosivos e tráfico de armas e de municiones, respectivamente.
En setembro de 2021 iniciábase este operativo cando, segundo relata a Garda Civil, na Xefatura de Información obtiñan datos procedentes do Centro de Intelixencia contra o Terrorismo e o Crime Organizado (CITCO) sobre a sospeitosa adquisición por parte de persoas de Sanxenxo e Pueyo de substancias precursoras de explosivos.
Estes precursores son elementos químicos que, a partir de determinadas concentracións e mesturadas entre si ou con outros produtos, son susceptibles de utilizarse para a fabricación caseira e ilícita de explosivos. O seu comercio, adquisición, tenencia e uso están rigorosamente controlados, segundo indican desde o Ministerio do Interior.
A través da investigación, os axentes lograban identificar ao primeiro comprador en Sanxenxo, unha persoa de 35 anos de idade que estaba a utilizar os precursores adquiridos para a fabricación caseira de mesturas explosivas e incendiarias como pólvora negra ou termita. Trátase de mesturas moi perigosas pola súa poder destrutivo, segundo a Garda Civil.
Ademais, este pontevedrés dedicábase a publicar vídeos nas súas redes sociais e en páxinas web de internet para explicar, paso a paso, como as elaboraba e os efectos que poden producir. A Garda Civil sinala o risco de que estes titoriais fosen utilizados por outras persoas para crear artefactos explosivos con fins delituosos ou violentos.
O segundo comprador atopábase na Comunidade Foral de Navarra. A través dunha terceira persoa da súa contorna, co obxectivo de non ser identificado, comprara os precursores. Trátase dun home de 40 anos de idade que xa foi detido en marzo de 2020 pola Garda Civil noutra operación contra o tráfico de armas. Naquela intervención desarticulouse un taller clandestino que tiña instalado no seu domicilio para a manipulación de armas de fueto para a súa venda no mercado de tráfico ilícito. O home chegou a ingresar en prisión provicional por estes feitos.
Nesta ocasión, este segundo home, xunto á súa parella, trataba de adquirir precursores para fabricar pólvora para empregala na fabricación ilegal de munición metálica con proxectil que vendían xunto coas armas coas que supostamente traficaban.
No operativo colaborou Interpol e descubriuse que recentemente a parella adquirira no estranxeiro un importante número de armas detonadoras, que se sospeitaba que se destinaron a transformarse en armas de fogo reais, en base aos antecedentes do detido.
A Garda Civil indica que con estas actuacións impediuse que os precursores de explosivos e as armas ilegais puidesen ser desviadas ao mercado negro, ademais de evitar o risco existente para a vida e integridade física das persoas que residían en Sanxenxo e en Pueyo, onde se fabricaban ou empregaban as mesturas explosivas en caso dunha detonación accidental durante a súa manipulación ou almacenamento.
Esta operación foi desenvolta pola Xefatura de Información (UCE 3) da Garda Civil conxuntamente cos Grupos de Información das Comandancias de Pontevedra e Navarra, co apoio do Grupo de Desactivación de Explosivos (GEDEX) de Pontevedra e o Servizo Cinolóxico (cans detectores de explosivos) de ambas as Comandancias, así como do Grupo de Acción Rápida (GAR) da Garda Civil.