As novas casetas da feira de artesanía de Portonovo contarán cun "deseño diferenciador"
![Redacción](/web/cache/scene/uploads/xornalistas/foto/_S7QytKoutjK3UsovKMnMzytWsi62MjSxUqrKz891Lsov0DEyAC_/_Il61oA_/506490f5a15ce-c6ku5opwb5qbtijalxd0_reasonably_small.jpeg)
Por Redacción
O Concello de Sanxenxo xa conta co prototipo de caseta que se empregará o próximo verán na Feira de Artesanía de Portonovo.
Trátase, asegura o goberno local, dun deseño "diferenciador, propio e sostible", que está asinado por Arrokabe Arquitectos (ARKB Sistemas) e que ofrece diferentes posibilidades de uso ao longo do ano para actividades de distinto tipo.
Para adquirir as novas casetas reservouse unha partida de 120.000 euros no orzamento da empresa municipal de Ínsula que se encargará de sacar a licitación a xestión da feira.
Tras anos xestionando o alugueiro das casetas para a cita estival esta nova proposta supoñerá a longo prazo, defenden, un importante aforro co engadido de que se poderán utilizar noutros momentos do ano.
A solución adoptada é o sistema 'feirador' cunha xeometría que permite unha mellor evacuación de auga e cuestións loxísticas de almacenamento e transporte.
Outra característica importante é o seu fácil montaxe.
A estrutura estará composta por piares triangulares de madeira que definen o espazo de mostrador central. O estante traseiro serve de fondo de almacenaxe e exposición, e a cuberta ofrece unha fronte-cartel intercambiable para acoller os elementos gráficos de personalización.
A dimensión de cada caseta será de 285x225x246 centímetros.