Absolto de branqueo aínda que o de furtivo non llo cren
Por Redacción
Nécoras, camaróns e vieiras que capturaba de forma furtiva e que lle reportaban uns 2.500 euros ao mes. Raúl Francisco Bóveda situou ante a Audiencia Provincial esta actividade como a orixe do seu patrimonio, que a Fiscalía vinculaba co tráfico de drogas e o acusaba de branquexar.
O tribunal acaba de resolver e dálle a razón a este narcotraficante de Ribadumia, absólveo ao considerar que non branquexou diñeiro procedente do narcotráfico. Iso si, advírtelle que o seu argumento peregrino dos elevados ingresos logrados grazas ao furtivismo tampouco resulta convincente, senón que máis ben o diñeiro viria da súa familia.
De feito, a sentenza recén ditada pola Sección Segunda da Audiencia Provincial nin sequera considera que os ingresos de Bóveda sexan tan elevados como para considerar que branquexou diñeiro como sostiña o fiscal, un delito polo que pedía que fose condenado a cinco anos de prisión cunha multa de 125.000 euros.
"Las cantidades que invirtió en la compra del piso no son excesivamente elevadas y serían fácilmente obtenibles con la ayuda de sus familiares, como alega el acusado, también es cierto que las cantidades que ingresó posteriormente para la amortización del préstamo hipotecario podrían haber sido sufragadas con ayuda de su familia", recolle a sentenza.
Engade a resolucion que"el importe que se fija como procedente del narcotráfico, podría muy bien haberse obtenido en base a la suma de recursos familiares, y esta tesis no puede descartarse. Todo ello unido a la constitución de una hipoteca por la mayor parte del importe de la venta, lo que hace pensar que el banco en cuestión habría valorado los recursos económicos del acusado para realizar dicha concesión".
Raúl Francisco Bóveda foi condenado pola Audiencia de Pontevedra a tres anos de prisión por un delito contra a saúde pública e ten pendentes causas xudiciais por operacións de tráfico de drogas en Boiro e Noia, que están en fase de instrución.