A CIG sairá en manifestación contra a reforma das pensións o 14 de novembro en Pontevedra e Vilagarcía
Por Anxo Lourido
O sindicato CIG convocou dúas manifestacións, en Pontevedra e en Vilagarcía de Arousa, en contra da nova reforma das pensións prevista polo goberno. As manifestacións serán o 14 de novembro e partirán da Ferrería en Pontevedra e da Casa do Mar en Arousa ás 20 horas.
Segundo manifestou Marcos Conde, secretario comarcal da CIG, o "comité de expertos" encargado de propoñer as medidas para elaborar a reforma non representa á sociedade senón á banca e ás aseguradoras ata o punto de que 9 dos 12 integrantes do comité son representantes destes sectores.
Segundo o máximo responsable comarcal da CIG, o PP recorta as pensións pero favorece as grandes empresas a quen responsabiliza da fraude fiscal. E destaca a perda de poder adquisitivo que remata por "aumentar a precariedade".
Ante esta situación, van realizar unha campaña de sensibilización para que se sumen participantes a esta manifestación con asembleas nos centros de traballo e tamén buscando outros afectados como as persoas actualmente xubiladas á que non se lle vai incrementar a pensión en relación co IPC e aos que están a punto de xubilarse. Para a próxima semana, a CIG convocou unha asemblea de delegados nos locais sindicais.