Afapo e Fagal demandan mans para tecer redes e recordos na loita contra o alzhéimer
Por Redacción
'Tecendo redes, tecendo recordos' é o título da mostra fotográfica que desde este xoves pode visitarse na sede de Afundación en Pontevedra. Trátase dunha proposta da Asociación de Familiares de Enfermos de Alzhéimer e Outras Demencias de Pontevedra (Afapo) en colaboración coa Federación de Alzhéimer de Galicia (Fagal) para finalizar as actividades que se desenvolveron con motivo do Día Mundial do Alzhéimer o 21 de setembro.
Quince colectivos autonómicos que forman parte de Fagal ofrecen unha mostra dos traballos que realizan no seu día a día. Esta enfermidade afecta a máis de 70.000 persoas en Galicia e, segundo o presidente de Afapo, José Manuel Fontenla, este ano a atención céntrase en previr como elemento básico para mellorar a calidade de vida futura das persoas con este tipo de demencia.
Segundo manifestaba o representante de Afapo na inauguración, a calidade de vida destes pacientes susténtase en que os servizos especializados de proximidade se atopen ao seu servizo e que poidan permanecer nas súas casas o maior tempo posible antes de ingresar nun centro especializado. Ante estas necesidades, Fontenla incidiu na necesidade de maiores recursos para facer fronte a esta enfermidade.
Marcos Rey, concelleiro de Benestar Social no Concello de Pontevedra, tamén asistía a este acto e destacaba que estas mostras permiten que a cidadanía se sensibilice sobre unha realidade que calquera persoa pode padecer antes ou despois.
O acto contou tamén coa presenza da deputada provincial Olga García Ballesteros; o presidente do Foro Empresa Pontevedra, Arturo Ramírez; e a concelleira local do Partido Popular, Silvia Xunco.
A exposición situada no vestíbulo do auditorio de Afundación pode visitarse tamén este venres 22 e os días 25 e 26 deste mes en horario de 11.00 a 14.00 horas e de 17.00 a 19.00 horas.
Relacionadas:
-
Benestar Social e Afapo impulsan talleres de memoria para maiores de 55 anos en centros sociais das parroquias de Pontevedra
Por Redacción |
-
Nova sede de AFAMO en Bueu para atender ás persoas afectadas polo Alzheimer
Por Redacción |
-
O Concello renova a súa colaboración anual con AFAPO e ASEII
Por Redacción |
-
"Alzhéimer hoxe, mañá será tarde", unha campaña sobre a importancia da prevención e detección precoz
Por Oskar Viéitez |
-
A deputada de Cohesión Social visita os talleres para persoas enfermas de Alzheimer do Salnés
Por Redacción |