Abre o prazo para coñecer o Complexo Intermareal Umia-O Grove a través de 'Voando nas Rías Baixas'
Por Redacción
Este luns, 11 de outubro, quedou aberto o prazo de inscrición para a terceira das rutas ornitolóxicas programadas pola Deputación Provincial de Pontevedra dentro da iniciativa 'Voando nas Rías Baixas'.
Esta nova ruta, que se desenvolverá o 24 de outubro e será guiada e de balde, permitirá coñecer a riqueza ornitolóxica e paisaxística do Complexo Intermareal Umia-O Grove, nos concellos de Cambados, O Grove, Meaño e Sanxenxo, unha das mellores zonas de España para a observación de aves acuáticas invernantes. Máis de 18.000 exemplares pasan os meses fríos nesta reserva.
En total, a Deputación oferta 20 prazas e as persoas interesadas poden anotarse na páxina web da Deputación (https://www.depo.gal/voando-nas-rias-baixas).
O Complexo Intermareal Umia-O Grove é un espazo protexido pola Rede Natura 2000 como Zona Húmida de Importancia Internacional e como Zona de Especial Interese Comunitario pola importancia da súa biodiversidade. No ano 2014 unha parte deste espazo foi declarado reserva ornitolóxica de SEO/BirdLife, sendo a reserva ornitolóxica máis grande de España, a única de Galicia e a única que conta con medio mariño.
A iniciativa, organizada en colaboración con SEO Birdlife, chega á súa cuarta edición co mesmo obxectivo: dar a coñecer a riqueza ornitolóxica da provincia e concienciar sobre a preservación de espazos naturais protexidos.
Continuará no mes de novembro, coa camiñada pola Enseada de San Simón (Redondela, Soutomaior, Pontevedra e Vilaboa) o día 14, coas inscricións abertas desde o día 2 de novembro.