Malestar na Travesía de Juan Bautista Andrade pola presenza habitual de vehículos que impiden a saída dos garaxes
Por Redacción
Residentes na Travesía Juan Bautista Andrade e tamén na rúa homónima denuncian un problema que leva tempo afectándoos. Segundo explican, a travesía ao contar só cunha vía de entrada e saída é utilizada por numerosos condutores para aparcar os seus vehículos en dobre fila ou sobre as beirarrúas e os pasos de peóns causando importantes problemas ás persoas que viven nesta contorna.
Afirman que os dous garaxes comunitarios situados en Travesía Juan Bautista Andrade atópanse, en numerosas ocasións, bloqueados debido á presenza de vehículos que impiden o acceso. Sinalan que, en moitos casos, esta situación é provocada por usuarios do caixeiro automático dunha entidade bancaria situada nesa zona.
Unha das denunciantes afirma que o caixeiro está aberto os sete días da semana e durante as 24 horas, por este motivo sofren situacións nas que os usuarios que acoden de madrugada a realizar operacións deixan o motor do vehículo en funcionamento e mesmo a música a alto volume causando malestar entre a veciñanza a esas horas da noite.
Afirman que pediron á Policía Local e tamén ao Concello de Pontevedra unha solución a este problema sen que, ata o momento, háxanlles resolvido o problema. Alertan, ademais, do perigo na seguridade viaria que se rexistra con frecuencia porque eses vehículos mal estacionados dificultan as manobras de saída cara á rúa Juan Bautista Andrade.