Ferido grave un veciño do Grove nun accidente laboral nunha batea
Por Natalia Puga
Un veciño do Grove de 37 anos resultou ferido e tivo que ser traslado ao Hospital Clínico Universitario de Santiago de Compostela tras sufrir un accidente laboral mentres traballaba nunha batea neste municipio
O accidente laboral rexistrouse pouco antes das nove da mañá deste luns e, como consecuencia do mesmo, o bateeiro ferido seccionou tres dedos da man dereita.
A Garda Civil e o servizo de Emerxencias do Grove confirman o accidente e traslado do ferido, que sufriu o contratempo cando manexaba unha máquina do barco bateeiro e foi trasladado a Porto Meloxo con axuda doutra embarcación.
Segundo confirma Emerxencias O Grove, á chegada dos servizos de emerxencias, o home estaba tombado no chan e tiña a man vendada. Os servizos de emerxencias revisaron a vendaxe e déronlle unha primeira asistencia ata a chegada dunha ambulancia medicalizada do 061.
Tras atendelo no propio peirao, decidiron trasladalo ao hospital.
Ata o lugar tamén se desprazou, ademais da Garda Civil, Emerxencias O Grove e os servizos médicos, a Policía Local do Grove.