Retiran árbores e pólas caídas do treito interurbano do río da Gándara en Cerponzóns
![Redacción](/web/cache/scene/uploads/xornalistas/foto/_S7QytKoutjK3UsovKMnMzytWsi62MjSxUqrKz891Lsov0DEyAC_/_Il61oA_/506490f5a15ce-c6ku5opwb5qbtijalxd0_reasonably_small.jpeg)
Por Redacción
Augas de Galicia está realizando actuacións de conservación e limpeza no treito interurbano do río da Gándara, no termo municipal de Pontevedra.
Segundo informou a Consellería de Infraestruturas e Mobilidade, estes traballos estanse a desenvolver nun treito deste río de 135 metros de lonxitude ao seu paso pola parroquia de San Vicente de Cerponzóns.
As tarefas céntranse na retirada de árbores e pólas caídas na canle para evitar atoamentos. Unha vez finalizadas estas actuacións, o río quedará despexado de maleza, posibilitando así a circulación fluída das súas augas.
Esta intervención contribuirá á mellora do leito fluvial para acadar condicións naturais do ecosistema que favorezan os aspectos medioambientais e de uso social na contorna do río.