A Xunta destinará case un millón de euros a programas de igualdade nos concellos pontevedreses
Por Redacción
Os traballos de promoción da igualdade na provincia de Pontevedra recibirán unha inxección económica de 998.000 euros, dos cales 680.000 corresponden a 39 concellos da área territorial da capital da provincia. Así se recolle na resolución da orde de axudas e subvencións a entidades locais publicada recentemente no DOG e que este luns foi explicada pola secretaria xeral da Igualdade, Susana López Abella.
Estas axudas servirán para a posta en marcha de iniciativas en tres liñas de actuación: a promoción da igualdade e a prevención e tratamento da violencia de xénero, o fomento da conciliación e o apoio aos Centros de Información á Muller (CIM). Os municipios recibirán un pagamento anticipado do 60% do importe das subvencións concedidas.
No conxunto da zona, son beneficiarios nesta convocatoria os concellos de A Cañiza, A Estrada, A Guarda, A Lama, Arbo, Bueu, Caldas de Reis, Campo Lameiro, Catoira, Cerdedo, Cotobade, Cuntis, Forcarei, Lalín, Marín, Meaño, Meis, Moraña, Poio, Ponte Caldelas, Ponteareas, Pontecesures, Pontevedra, Ribadumia, Barro, Portas, Vilaboa, Cambados, Rodeiro, Sanxenxo, Silleda, Tomiño, Tui, Valga, Vila de Cruces, Vilagarcía, Vilanova, O Grove, O Rosal e a Mancomunidade de O Salnés.
O programa de promoción da igualdade entre mulleres e homes está destinado a medidas como actividades de coeducación dirixidas á poboación infantil e xuvenil ou elaboración de plans municipais de igualdade de oportunidades. Tamén actívase unha liña de accións de prevención e tratamento da violencia de xénero e intervencións de carácter integral coas vítimas. Na área de Pontevedra, este programa recibe 72.620,28 euros.
Pola súa banda, o programa destinado á conciliación subvenciona todas aquelas accións que os concellos adopten coa finalidade de facilitar a conciliación da vida persoal, familiar e laboral das persoas traballadoras, como os bancos de tempo ou os plans de programación do tempo das cidades. Neste caso, os municipios da área de Pontevedra reciben un total de 31.039,45 euros.
Por último, o programa dedicado aos CIM, ten por obxecto colaborar coas entidades locais no funcionamento destes centros, coa finalidade de garantir a prestación dun servizo de información ás mulleres e promoción da igualdade, que lles proporcione asesoramento xurídico e psicolóxico; información sobre recursos específicos para mulleres, así como o desenvolvemento de calquera outra actividade que teña como obxectivo prioritario a promoción da igualdade entre mulleres e homes. Este é o programa que recibe un maior volume de investimento para os concellos da área territorial de Pontevedra cunha contía de case 575.072,87 euros.
Na área territorial de Pontevedra existen 17 CIM, tres deles compartidos entre concellos. Así, contan cun Centro de Información á Muller, A Estrada, A Guarda, A Lama (compartido con Cotobade e Fornelos de Montes), Bueu, Caldas de Reis (compartido con Portas e Barro), Poio, Ponte Caldelas, Ponteareas, Pontevedra, Sanxenxo, Silleda, Vilagarcía, Vilanova, O Grove e a Mancomunidade de O Salnés (Meis, Ribadumia e Cambados). A estes hai que engadir o situado en Soutomaior e que beneficia tamén ao concello de Vilaboa e a Pazos de Borbén.