A oficina principal de Correos quedará sen seguridade privada a partir do 1 de novembro
Por Diego Espiño
A dirección de Correos e a empresa concesionaria da seguridade, Sabico, decidiron segundo a CIG reducir drasticamente o persoal que se ocupa destas funcións en Galicia.
Esa decisión, que se fará efectiva a partir do 1 de novembro, supón a redución de 21 postos de traballo, cinco deles na cidade de Pontevedra.
O sindicato apunta que a consecuencia máis directa será que a oficina principal na cidade de Lérez quedará sen seguridade privada, limitándose ese servizo a unha persoa na central operativa da Avenida de Lugo ao ser un centro de recepción de paquetería e contar cun escáner.
Así o recoñece a secretaria comarcal de CIG-Servizos Diana Rodríguez: "é un asunto grave porque xa non afecta só aos traballadores senón aos usuarios. Son edificios patrimonio do estado, aquí os traballadores traballan con cartos, cantidades moi altas de diñeiro".
Delegados do sindicato nacionalista e traballadores afectados mobilizáronse ante a oficina principal de Pontevedra. Alí explicaron que a única solución proposta pola concesionaria é un traslado a Sevilla para traballar coas mesma condicións nun centro penitenciario, unha opción que, aseguran, vense obrigados a aceptar: "case todos van a optar por trasladarse porque con 47 ou 50 anos que fas, te quedas cunha indemnización que non chega os 15.000 euros?"
A redución da seguridade privada afecta ademais ás oficinas de Correos en Vigo, Lugo, Ourense e A Coruña.