Campelo apúntase á celebración da Oktoberfest
Por Diego Espiño
Campelo sumarase a próxima fin de semana, venres 11 e sábado 12 de outubro, á moda das festas alemás coa celebración do seu primeiro Oktoberfest.
Un grupo de veciños uniuse para organizar o evento en colaboración da Sociedade Deportiva Campelo, a quen irán destinado o 20% da recadación para financiar a tempada deportiva do equipo que milita na Terceira Rexional.
Serán case 3.000 litros de cervexa (loura, tostada e de trigo) os que estarán preparados nunha celebración na que tamén se poderán consumir salchichas brancas e frankfurt con pan artesán, todo iso a prezos populares.
O medio litro de cervexa custará 3,5 euros, mentres o litro ascende a 5,5 euros, con prezos especiais para os combinados con bebida e comida.
Para facilitar a asistencia a Oktoberfest contará cun servizo de autobuses gratuítos dende Pontevedra (Alameda), parando ante o Casal de Ferreirós, na Seara e Combarro antes de chegar ao recinto, na Praza da Granxa. A frecuencia do transporte será dunha hora.
A festa alemá desenvolverase dende as 20:30 horas do venres ata a 1:30 da madrugada, mentres o sábado as instalacións abrirán xa a mediodía, ás 12:00 horas, tamén ata a 1:30.
Para completar as actividades a organización contratou ao grupo folk Avelaiña para o venres e ao músico Tony Lomba para a xornada do sábado.