O Mercantil recupera a súa oferta lúdica e deportiva de verán
Por Manu Otero
As instalacións deportivas do Casino Mercantil en Mourente volverán ser un fervedoiro de actividade lúdica e deportiva este verán. A pandemia da covid-19 obrigou a suspender os tradicionais campamentos estivais, que este ano se recuperan cunha variada oferta e con todas as garantías de seguridade.
A partir do mes de xullo, tanto socios como persoas alleas á institución, poderán participar en cursos de tenis, voley praia ou nos campamentos temáticos quincenais que se desenvolverán en horario matinal ata finais do mes de agosto. "Fixemos un esforzo importante para dispoñer dunha oferta lúdica e deportiva importante. Estamos satisfeitos", sinalan desde a directiva do Mercantil, desde a que recoñecen a "necesidade de aumentar a súa masa social para seguir mellorando".
A actividade deportiva centrará a oferta de verán. O Club Voleibol Pontevedra organizará por cuarto ano consecutivo a escola de voley praia entre xullo e agosto coa posibilidade de matricular por quincena, por mes ou para os dous meses de actividade. Está pensado para menores de entre 8 e 18 anos, aínda que se algún adulto desexa participar tamén poderá facelo. Ademais, os participantes neste campamento terán a posibilidade de competir en torneos de verán e mesmo chegar a federarse.
Do campamento de tenis ocúpase a empresa DM Sports, que este verán organizará o seu primeiro campus de verán que se centrará principalmente en formar aos participantes na práctica deste deporte, pero tamén haberá outras actividades complementarias como o pádel, a capoeira, xornadas de piscina e práctica de inglés.
Con todo, para os máis avanzados está dispoñible un curso intensivo de competición na que os tenistas terán a oportunidade de perfeccionar os seus movementos e mellorar a súa preparación física.
Pero una das actividades máis demandadas son os campamentos urbanos, pensados para facer as delicias dos máis pequenos da familia con todo tipo de actividades lúdicas aproveitando as instalacións do Mercantil, que iniciará a tempada de verán nos próximos días.
Os interesados en participar nestas actividades deben poñerse en contacto coas oficinas do Casino Mercantil.