Seis meses sen poder achegarse a un bar do Grove tras ameazar ao dono e dous clientes con pistolas de aire comprimido
Por Natalia Puga
Un veciño do Grove non poderá achegarse ao bar 'T7' da súa localidade durante o próximos seis meses. Trátase dunha decisión xudicial tras protagonizar a pasada fin de semana un incidente no que ameazou a dous clientes e o dono do establecemento con dúas pistolas que parecían reais, aínda que resultaron ser de aire comprimido.
Os feitos ocorreron o sábado e, tras o incidente, o home foi detido pola Garda Civil por un delito de ameazas graves e trasladado ás súas dependencias. Horas máis tarde, ese mesmo sábado, foi trasladado ao xulgado e celebrouse un xuízo rápido no que se lle impuxo a citada orde de afastamento de seis meses.
Segundo a información facilitada polo Tribunal Superior de Xustiza de Galicia (TSXG), a Garda Civil identificou a tres prexudicados e todos foron citados para comparecer o sábado pola tarde no Xulgado de Instrución número 4 de Cambados, aínda que tan só se presentou o propietario do bar, non os dous clientes supostamente ameazados.
No xuízo rápido celebrado, houbo conformidade de todas as partes e a xuíza condenou ao detido a catro meses de prisión, aínda que a pena quedou suspendida co visto e prace da Fiscalía, pois o home, de 53 anos, non tiña antecedentes.
Si se aplica a outra parte da condena, unha orde de afastamento do bar durante seis meses. A xuíza preguntou ao dono do establecemento se quería unha orde de afastamento que impedise ao detido achegarse á súa persoa, pero rexeitouna.
Ademais, por orde xudicial, procedeuse ao comiso das armas usadas durante o altercado, dúas pistolas de aire comprimido.