Poio pacta cos empresarios afectados pola covid-19 as bases para conceder as axudas municipais
Por Redacción
Representantes do Concello de Poio mantiveron este mércores un encontro telemático con profesionais dos sectores máis afectados pola crise derivada da pandemia da covid-19 que serviu para dar forma ás bases polas que se rexerán as axudas directas que o Concello de Poio ofrecerá a estes negocios que viron reducida a súa actividade.
Despois de facilitarlles o borrador, os concelleiros escoitaron as achegas dos participantes e o goberno local mostrouse favorable ao establecemento de dous tramos diferentes á hora de repartir as axudas, cuxo orzamento ascende a 150.000 euros, 100.000 de fondos propios e 50.000 procedentes da Deputación.
Aquelas empresas que viron a súa facturación reducida a máis dun 50 % no 2020 en comparación co ano anterior terán dereito a acceder ás axudas máis altas, ata un máximo de 1.000 euros. Mentres que a contía será inferior para aqueles empresarios que sufrisen perdas entre o 35 % e o 50 % no exercicio do 2020.
A intención do Concello é aprobar as bases nas próximas semanas para que poidan comezar a tramitarse as axudas "canto antes". Ademais estas subvencións serán compatibles coas convocadas por calquera outra administración.