O Concello rebaixará o prezo da auga a comercios e oficinas
Por Oskar Viéitez
O Concello de Pontevedra baixará o recibo da auga un 2% e o de rede de sumidoiros un 1,3% globalmente. Esta medida afecta a 2.693 suxeitos impositivos, de todo o sector comercial e industrial. Era unha das reivindicacións permanentes da Asociación de Empresarios da Mediana e Pequena empresa, que o Concello rebaixase o prezo da auga aos comercios e oficinas, que considera discriminatorio.
Durante décadas, con alcaldes de distinta cor política que estiveron á fronte da casa do concello, os responsables de AEMPE teñen trasladado as queixas do colectivo polo feito de que un comercio tan só por ter un lavabo e un retrete tivese que pagar un consumo mínimo de 45 metros cúbicos ao bimestre, cando unha casa onde son catro de familia, con lavadora, lavalouza, duchas e demais, paga por un mínimo de 15 metros cúbicos.
O problema era que o actual contrato subscrito polo concello fixa uns consumos mínimos, polo que sería necesario modificar o contrato incluíndo unhas retribucións diferentes ou sería necesario contratar máis persoal para levar contabilidades separadas o que incrementaría o custo da xestión. Tras varias reunións do concelleiro de Facenda, Raimundo González, cos responsables de AEMPE acordouse unha solución intermedia: o Concello baixará o importe dos consumos mínimos. ÿ dicir, polos 45 metros cúbicos de auga vaise cobrar menos diñeiro que ata agora.
Para o próximo ano 2.693 comercios e despachos verán rebaixados os seus recibos da auga un 2% e o de rede de sumidoiros un 1,3%.
Aínda que a rebaixa podería parecer pouca cousa os comerciantes non lle fixeron noxos, e segundo trasladou o concelleiro de Facenda, Raimundo González, a medida foi ben acollida por comerciantes e pequenos empresarios.
O concelleiro de Facenda recoñeceu que os comerciantes teñen razón nos seus argumentos e tamén admitiu que "xa sei que esta non é a petición de AEMPE a que estamos resolvendo, non é grande cousa, pero calquera outra medida suporía recompoñer a taxa e trasladala presión fiscal duns aos outros, entendemos que este fórmula entra dentro do xogo que nos permite ao concello", explicou.
CONXELACIÿN DAS TAXAS
Ademais o Concello acordou con AEMPE unha conxelación das taxas para o 2014 e para o 2015.
Este aforro fiscal supoñerá unha serie de reaxustes como penalizar os consumos superiores a 45, 15 ou 200 metros cúbicos, pero en principio para o Concello é asumible", sen ter un cálculo definitivo o edil situou nuns 50.000 euros o custo da medida para as arcas municipais. "Para o próximo contrato haberá que cambiar isto", admitiu Raimundo González.