Unha empresa de xestión de residuos orgánicos, segunda Iniciativa Local de Emprego en 2012
Por Redacción
Proporcionar solucións ás industrias para neutralizar, e mesmo tirar partido de todo tipo de residuos orgánicos, é o obxectivo da empresa Bioprana World. ÿ a segunda Iniciativa Local de Emprego, despois de Ponte.tv, a primeira televisión por Internet de Pontevedra, que se presenta neste ano.
Bioprana World está constituída por tres emprendedores pontevedreses encabezados por José Fernando Rey Pazos, un enxeñeiro de telecomunicacións que ata o de agora fixera a súa carreira profesional no campo das vendas. Pretenden ofrecer servizos ecolóxicos a empresas altamente contaminantes. Para elo ofertarán biotecnoloxía baseada en microorganismos que permitirá tratar "in situ" todo tipo de puríns e residuos vacúns, porcinos ou avícolas.
Esta nova empresa permite transformar estes residuos en abono orgánico ou biofertilizantes. Pero outros campos da súa acción serán o tratamento de biogás a prezos competitivos e, máis adiante, o biodiésel. Nunha primeira etapa, as industrias en xeral, pero especialmente as agrogandeiras, serán os seus principais clientes, pero non descartan ofertar servizos para as economías domésticas.
Na presentación, a concelleira de Promoción Económica, Carlota Román, recordou que teñen a consideración de Iniciativas de Emprego Local os proxectos empresariais innovadores e xeradores de emprego. O apoio municipal consiste en asesoramento dos axentes de emprego local, apoio técnico no inicio da actividade durante un período de seis meses e inclusión nos proxectos para o fomento do emprego que realice o Concello.