Ampliaranse as beirarrúas da Avenida de Lugo para mellorar os accesos ao colexio Vilaverde
Por Redacción
Os accesos ao colexio Villaverde, en Mourente, serán máis seguros. A Xunta de Goberno do Concello de Pontevedra aprobou destinar 76.000 euros para a mellora da accesibilidade do tramo inicial da Avenida de Lugo.
Concretamente ampliaranse as beirarrúas desde a rotonda de Juan Carlos I ata a estrada que dá acceso ao centro educativo, "un dous colexios con máis alumnado do Concello", segundo o voceiro municipal, Raimundo González.
A estreitez das beirarrúas nesta zona é, segundo o concelleiro nacionalista, "un problema real" xa que os alumnos debían ata introducirse na estación de servizo situada na zona para circular con certa seguridade. A mellora agora aprobada, executarase en próximas semanas.
Ademais, a Xunta de Goberno aprobou entre outras cuestións, destinar 71.500 euros para o subministro de gasóleo C aos centros de preescolar do municipio, así como aos edificios municipais e o cemiterio de San Mauro, "no que hai unha caldeira na que ás veces quéimanse cousas, nada que ver cos crematorios que queren montar na cidade", bromeou Raimundo González.
Pola súa banda, o Concello de Pontevedra declarou sete dos vehículos do seu parque móbil, especialmente procedentes da brigada de obras, como "efectos non utilizables", o que permitirá a súa venda como ferruxe. Trátase de vehículos con máis de vinte anos de antigüidade "e que se avariaban continuamente ou xa non se usaban", entre eles unha furgoneta AVIA de 1976. "O que demostra que utilizamos os vehículos ata a extenuación", explicou González. Ingresarase por iso apenas 450 euros.