ADIF saca a poxa 373 inmobles en toda España, entre eles dous locais comerciais en Pontevedra
![Redacción](/web/cache/scene/uploads/xornalistas/foto/_S7QytKoutjK3UsovKMnMzytWsi62MjSxUqrKz891Lsov0DEyAC_/_Il61oA_/506490f5a15ce-c6ku5opwb5qbtijalxd0_reasonably_small.jpeg)
Por Redacción
O Administrador de Infraestructuras Ferroviarias (ADIF) puxo á venda, a través dunha poxa pública, un total de 373 inmobles repartidos en distintas provincias que inclúen vivendas, locais, prazas de garaxe e trasteiros. Entre as localidades en que se sitúan atópase Pontevedra. Neste caso trátase de dous locais comerciais situados na Cidade de Pedra, concretamente na Praza dos Maios.
Son dous locais de 136 e 119 metros cadrados, que saen a poxa cun prezo de 170.000 y 150.000 euros, respectivamente
A operación enmárcase, segundo informa Adif nun comunicado, no plan de racionalización de activos que leva a cabo a compañía do Ministerio de Fomento, coa que pretende vender un total de 1.500 inmobles ata fin de ano. Ademais, tamén poxa varias estacións en desuso para o servizo ferroviario. Con este plan, busca mellorar a eficiencia na xestión destes activos inmobiliarios, xerar ingresos e reducir custos.
Este plan busca poñer en valor o patrimonio inmobiliario da empresa pública que non forma parte substancial e imprescindible para o desenvolvemento da súa actividade, ademais de ofrecer vivendas aos seus actuais inquilinos e optimizar o uso dos espazos e dependencias de carácter interno.
En canto a poxa de activos que agora se pon en marcha, integra 373 inmobles, entre vivendas, locais comerciais, prazas de garaxe e trasteiros, que se organizaron en 231 lotes. O prezo de saída dos inmobles oscila entre os 1.020 euros dun trasteiro e os 765.000 euros dun local comercial.
Están situados en Alicante, Águilas (Murcia), Jerez de la Frontera (Cádiz), Valencia, Ávila, Valladolid, Oviedo, Pamplona, Pontevedra, Ciudad Real, Zaragoza, Miranda de Ebro (Burgos), Peñaranda de Bracamonte (Salamanca), Tomelloso (Ciudad Real), Xátiva (Valencia) e Calatayud (Zaragoza).
Adif encomendou a organización da poxa pública á sociedade estatal de Xestión Inmobiliaria de Patrimonio (Segipsa). As poxas celebraranse en Madrid os próximos días 22, 23 e 24 de outubro. Tamén se poden presentar ofertas por escrito e enviadas por correo.