De picnic en pleno centro da cidade
Por Redacción
As altas temperaturas que estamos a sufrir durante este mes de setembro invitan a que todos os cidadáns busquen sombra para evitar o sol. Durante este sábado, a imaxe máis curiosa ofreceuna unha parella de turistas que ao mediodía se sentaron a comer nun dos xardíns do centro da cidade. Os visitantes instaláronse con mantel e a súa correspondente comida no pequeno xardín situado no cruzamento entre a rúa Peregrina e Daniel de la Sota. Os numerosos paseantes que circulan por esa zona miraban sorprendidos esta imaxe pouco habitual neste punto da cidade.
Tamén nos xardíns de Vicenti, nos máis próximos ao edificio da Deputación, varias persoas tombáronse sobre o céspede artificial en busca de sombra e alí pasaron varias horas do mediodía lendo e descansando.
Para mañá, domingo 15, agárdase que as temperaturas máximas alcancen os 28 graos con ceos despexados pola mañá aínda que con entrada de nubes durante a tarde.