A boa evolución da incidencia da covid-19 en Pontevedra, Marín e Poio levou ás autoridades sanitarias a aliviar as restricións impostas nestes tres municipios. Así o anunciou este venres o conselleiro de Sanidade, Julio García Comesaña.

Esta decisión, que vén avalada polo subcomité clínico, permitirá que os establecementos de hostalería poidan atender a clientes no seu interior, cun límite máximo de ocupación do 30%. O aforo nas terrazas mantense no 50%. Todo iso ata as cinco da tarde.

As reunións sociais, tanto en espazos públicos como privados, seguirán limitadas a catro persoas e tamén continuará vixente o peche perimetral decretado na área que forman de maneira conxunta Pontevedra, Marín e Poio.

O cambio do nivel de restrición, que quedará fixado no medio-alto, débese especialmente á menor incidencia acumulada a 14 días, que se situou na contorna dos 150 casos por cada 100.000 habitantes, e a unha presión asistencial "suficientemente favorable".

O conselleiro de Sanidade fixo un chamamento á prudencia a pesar desta "pequena apertura". Instou á cidadáns da área de Pontevedra a manter o "mesmo comportamento" que nas últimas semanas ao demostrarse que "dá resultados".

"Non podemos botar todo pola borda ás primeiras de cambio", sinalou García Comesaña, que recomendou limitar a mobilidade "ao máximo" e reducir os encontros sociais aos "imprescindibles". 

A este respecto, o doutor Pedro Rascado, membro do comité clínico, lembrou que o virus "segue entre nós" e que aproveitará "calquera oportunidade que teña" para incrementar a súa incidencia. "Non podemos volver atrás", advertiu.

É "fundamental", engadiu, que nas próximas festas "tratemos de evitar" os encontros sociais con amigos e lembrou que "non todo o que está permitido é razoable facelo".

VILANOVA, SEN RESTRICIÓNS ESPECIAIS

Dentro da área sanitaria de Pontevedra tamén hai novidades con respecto aos municipios de Vilagarcía de Arousa e Vilanova de Arousa, segundo García Comesaña.

Sanidade elimina todas as restricións especiais en Vilanova de Arousa, que pasa a estar no nivel básico no que, de maneira xeral, está toda Galicia. Iso é posible tras reducir a súa incidencia a 97 casos por cada 100.000 habitantes.

Todo o contrario que Vilagarcía. A pesar das restricións, a situación "non acaba de mellorar", segundo as autoridades sanitarias, que manterán unha "vixilancia detallada". Aínda que a tendencia é "estable", incrementáronse os casos no últimos tres días.