Unha árbore corta un carril do acceso a Monte Porreiro
Por Redacción
Unha árbore en malas condicións caeuse ao mediodía deste sábado e provocou o corte dun carril de circulación da avenida de Bos Aires entre a ponte dos Tirantes e o barrio de Monte Porreiro.
Segundo informaron os Bombeiros de Pontevedra, a árbore derrubouse pasadas as 13.40 horas. A Policía Local alertoulles porque estaba obstaculizando a circulación da estrada á altura da praia fluvial do río Lérez.
Para liberar a estrada e permitir que o tráfico puidese restituírse con normalidade, os bombeiros retiraron as ramas e cortaron o tronco cunha motoserra. A intervención durou ao redor dunha hora, durante a que a Policía Local regulou o paso de vehículos para evitar incidencias.