O Parlamento demanda á Xunta melloras no conservatorio de música de Pontevedra
Por Oskar Viéitez
O Parlamento galego acordou por unanimidade demandar á Xunta que arranxe os problemas de ventilación no conservatorio de música Manuel Quiroga de Pontevedra, unha deficiencia nas instalacións que xa ocasionaba graves dificultades para a normal actividade do centro e que, agora, co actual contexto de pandemia, implica ademais un elevado risco para a saúde de profesorado e alumnado.
A proposición non de lei do BNG aprobada este venres no Parlamento insta á Xunta a que resolva as deficiencias nos catro pisos do edifico do conservatorio, co arranxo de todas as fiestras na totalidade das instalacións, ademais de impulsar a avaliación das necesidades técnicas do centro para dar cumprimento aos protocolos e plans anti-covid.
Neste último sentido, o portavoz de Educación do BNG, Manuel Lourenzo, referiuse entre outras cuestións á ausencia de rede wifi e equipos informáticos dotados de cámaras web, carencia de recursos que imposibilita a implementación do protocolo de ensino virtual no conservatorio Manuel Quiroga.
A deputada do grupo popular Elena Suárez Sarmiento indicou que na reunión celebrada este xoves por parte da Xefatura Provincial de Educación en Pontevedra e o equipo directivo do Conservatorio de Música Manuel Quiroga, anunciouse a decisión de iniciar as obras nos vindeiros días.
Nesta reunión, a Xefatura Territorial puxo de manifesto que a única opción válida é acometer, en diferentes fases, as adaptacións da carpintería exterior para mellorar a ventilación do conservatorio con aire natural.
Deste xeito, anunciou que estas obras iniciaranse nos vindeiros días e afectará a arredor de 30 fiestras que precisan dunha intervención máis inmediata, unha actuación que suporá un investimento de 30.000 euros.
Relacionadas:
-
Renovan as fiestras do conservatorio de música Manuel Quiroga
Por Redacción |
-
As aulas do Conservatorio Manuel Quiroga seguen sen ventilación
Por Redacción |
-
A partir deste sábado 14 estará dispoñible o novo aparcadoiro de Valdecorvos
Por Mónica Patxot & Redacción |
-
Os problemas de ventilación no Conservatorio de Música Manuel Quiroga chegan ao Parlamento de Galicia
Por Redacción |
-
A CIG alerta de problemas de ventilación nas aulas do conservatorio de Manuel Quiroga
Por Redacción |