Ence avanza nas súas relacións coas asociacións de produtores: comproulles dende marzo 405.000 toneladas
Por Redacción
A Asociación Forestal do Ortegal (ASFOR) venderá 30.000 toneladas de madeira de eucalipto a Ence nos próximos meses. A venda é froito dun acordo recentemente asinado que implica que a empresa pasteira con planta en Lourizán avanza no seu obxectivo de establecer relacións directas con asociacións de produtores.
Con esta medida contribúe, ademais, "a fortalecer o sector forestal apoiando a súa profesionalización", pois, segundo indica a empresa, "os acordos asinados con estas asociacións establecen pautas para a colaboración entre os produtores de madeira e Ence en cuestións estruturais para o futuro do sector forestal".
A ordenación dos cultivos forestais, a mellora fitosanitaria, a xestión sostible das masas de eucaliptos ou a dotación de maior transparencia ao mercado da madeira son algúns destes asuntos.
O acordo alcanzado entre os produtores de madeira e Ence súmase aos xa asinados con outras asociacións de produtores de Galicia. Desde marzo, Ence asinou acordos para a compra de ata 405.000 toneladas de madeira con asociacións de produtores. Supera así amplamente as 250.000 toneladas dos acordos establecidos con asociacións de produtores en 2011.
Ence desenvolve ademais unha intensa actividade de intercambio de información con produtores de madeira de toda Galicia e o occidente asturiano. Especialistas forestais da compañía están promovendo encontros nos que se intercambia información sobre temas como a localización das plantas, o prezo da madeira ou a certificación, ou as claves para desenvolver unha plantación exemplar.
A Asociación Forestal do Ortegal (ASFOR) é unha asociación de recente creación que agrupa a propietarios que se uniron para comercializar a súa madeira na zona, "ao non atopar na actualidade, e nesta zona, asociación que lles dea cobertura para a venda", sinala a pasteira nun comunicado.