Gardas civís de Pontevedra colaboran para desmantelar un 'narcoembarcadoiro' en Málaga
Por Redacción
Axentes da comandancia da Garda Civil en Pontevedra desenvolveron, en colaboración cos seus homólogos de Málaga, unha operación que desembocou no desmantelamento dun 'narcoembarcadoiro' situado nunha praia da comarca malagueña de La Axarquía. Era utilizado para introducir en España cargamentos de haxix.
Neste operativo, no que tamén participaron efectivos da unidade OCON-SUR, organismo da Garda Civil creado para a loita contra a droga no sur español, foron detidas quince persoas e outras dezanove están implicadas en calidade de investigados.
A todos eles acúsaselles de delitos de tráfico de drogas, pertenza a organización criminal e contrabando de xéneros prohibidos.
Por agora descoñécese se esta organización ten algún vínculo con clans galegos da droga, aínda que a participación de axentes de Pontevedra pode orientar neste sentido.
A rede criminal desarticulada nesta operación, que foi bautizada como "Jarto", encargábase da preparación, montaxe, almacenamento e botadura de embarcacións de alta velocidade utilizadas para transportar grandes cantidades de haxix procedentes de Marrocos.
Operaban desde un varadoiro seco da Axarquía. Durante o horario de peche, a organización aproveitaba as instalacións e os recursos humanos e materiais da mesma para usala como 'narcoembarcadoiro', que empregaban organizacións do Campo de Xibraltar e Málaga.
O modus operandi desta organización consistía en transportar no interior dun camión de gran tonelaxe unha embarcación semirrígida de alta velocidade.
Cando os membros que vixiaban a instalación e os arredores detectaban que non había presenza policial na zona, o camión entraba no embarcadoiro onde descargaban a embarcación e introducíana no mar para dirixirse a Marrocos para cargar a droga.
Os investigadores detectaron varias células que traballaban independentemente aínda que coordinadas para lograr as botaduras das embarcacións de diferentes organizacións.
Nesta operación, cuxas investigacións arrancaron en setembro de 2019, realizáronse nove rexistros en Málaga, Córdoba e Sevilla, nos que se incautaron oito embarcacións de alta velocidade valoradas en máis de 1.500.000 euros:
Ademais, requisáronse 600.000 euros en metálico, varios vehículos de alta gama, máis de 10.000 litros de gasolina para a reposición das embarcacións, maquinaria pesada e camións utilizados para o transporte das embarcacións e dez motores de gran cilindrada.