Veciños de San Amaro saen de novo á rúa para reclamar máis seguridade viaria na zona
Por Redacción
O perigo que supón para os peóns e os vehículos o estado actual da estrada de San Amaro levou de novo aos veciños da zona a saír á rúa para esixir unha mellora da seguridade viaria.
Advirten que as beiravías desta estrada teñen moita profundidade, o que provoca accidentes de tráfico. O último deles pasou, recordan os veciños, hai apenas quince días.
Os veciños aseguran que debido ao pouco ancho da vía cando pasan dous vehículos un pequeno despiste pode provocar estes sinistros, algúns deles de consideración.
Ademais da profundidade destas beiravías, a pouca visibilidade pola mala iluminación da vía pode provocar tamén accidentes nos viandantes, apuntan os afectados.
Os afectados, que contaron co apoio dos concelleiros do PP, piden a implicación do alcalde de Barro neste asunto, aínda que a estrada non sexa de competencia municipal.