Envorca un camión con 24.000 quilos de fertilizante en Vilanova e resulta ferido o seu condutor
Por Redacción
Un home resultou ferido despois de que o camión que conducía envorcase en Vilanova de Arousa e perdese a súa carga, uns 24.000 quilos de fertilizante granulado.
O suceso produciuse nunha rotonda situada no quilómetro 18 da estrada PO-531, segundo informou o 112 Galicia.
O camioneiro, tras ser atendido no lugar, tivo que ser trasladado a un centro hospitalario.
A empresa transportista á que pertence o camión encargouse da limpeza da vía e do transbordo da mercadoría que finalizou esparexida no accidente.
Ao momento no que se rexistrou o accidente tamén acudiron axentes da Garda Civil de Tráfico, que tiveron que regular o tráfico na rotonda ata que se restableceu a normalidade na zona.
Efectivos dos Bombeiros do Salnés, axentes da Policía Local de Vilanova e membros de Protección Civil da localidade completaron o dispositivo de emerxencias.