Teletaxi, chega a competencia ao sector en Pontevedra
Por Diego Espiño
Os taxis de Pontevedra contan dende este mércores con dúas plataformas ás que acudir para solicitar un servizo. Ao tradicional Radiotaxi (986 86 85 85) únese agora unha agrupación de varios profesionais, Teletaxi (986 10 10 10).
Neste novo servizo están presentes 12 dos 90 taxis da cidade, que instalaron un sistema de aviso mediante GPS e que segundo o voceiro do colectivo, José María López, elimina os transmisores dos coches: "hai unha serie de taxis que non teñen ningún servizo, outros están en radiotaxi e agora nós, que empezamos con 12".
O custo de instalación do sistema ascende a 500 euros por coche, sendo un sistema que segundo López garante que acudirá á chamada o taxi máis próximo ao lugar.
Operarán nas 16 paradas da cidade cun custo mínimo de viaxe de 2,70 euros: "non que é a regulamentación da Xunta son 3 euros".
Para José María López trátase de buscar "unha opción competitiva" ante a baixada de ingresos que afecta ao sector: "o servizo en Pontevedra está mal, baixounos o 50% o que é o traballo, por eso queremos innovar e facer unha cousa nova".