Cambia o tempo: adeus ao sol e ás altas temperaturas
Por Redacción
Cambia o tempo nas Rías Baixas. Agárdase para os vindeiros días unha alternancia de períodos de ceos moi anubrados con outros con nubes e claros.
Informa MeteoGalicia que este luns un centro de baixas presións situado ao noroeste de Galicia deixará unha xornada de inestabilidade atmosférica.
Deste xeito, os ceos estarán parcialmente anubrados con precipitacións que comezarán pola franxa atlántica, sendo localmente treboentas no interior pola tarde. As temperaturas mínimas descenderon lixeiramente, mentres que as máximas sufrirán un notable descenso. O vento soprará frouxo de compoñente sur.
O martes continuaremos na influencia dunha borrasca situada ao noroeste de Galicia dende onde achega inestabilidade. Así agárdase unha xornada de ceos máis nubrados e con chuvias febles ao oeste, con algún chuvasco ocasional pola tarde no terzo norte. As temperaturas sufrirán un lixeiro descenso. Os ventos soprarán frouxos de compoñente sur, con intervalos moderados.
A borrasca situada ao noroeste irase desprazando o mércores cara ao sur e o seu sistema frontal rozará Galicia polo oeste. Así, agárdase un día de ceos nubrados con chuvascos ocasionais, máis probables en áreas de montaña. Pola noite a chegada da fronte traerá choivas ao suroeste da Comunidade. As temperaturas mínimas seguirán sen cambios e as máximas sufrirán un lixeiro descenso. Os ventos soprarán frouxos de compoñente sur.