Dous mozos feridos graves nun espectacular accidente nocturno en Mourente
![Redacción](/web/cache/scene/uploads/xornalistas/foto/_S7QytKoutjK3UsovKMnMzytWsi62MjSxUqrKz891Lsov0DEyAC_/_Il61oA_/506490f5a15ce-c6ku5opwb5qbtijalxd0_reasonably_small.jpeg)
Por Redacción
![](/web/cache/scene/uploads/fotos/foto/_S7QytKoutjK3UsovKMnMzytWsi62MjKxUipKLc6sStUxMjDQSU_/_7NK0kt0snNTEnJSVWyrgUA_/5348541a760a9-accidente-mourente.jpg)
© Diego Torrado
![](/web/cache/scene/uploads/fotos/foto/_S7QytKoutjK3UsovKMnMzytWsi62MjKxUipKLc6sStUxMjDQSU_/_7NK0kt0snNTEnJSVWyrgUA_/534853fe66379-accidente-mourente-3.jpg)
© Diego Torrado
![](/web/cache/scene/uploads/fotos/foto/_S7QytKoutjK3UsovKMnMzytWsi62MjKxUipKLc6sStUxMjDQSU_/_7NK0kt0snNTEnJSVWyrgUA_/53485415a08f3-accidente-mourente-4.jpg)
© Diego Torrado
Dous mozos resultaron feridos graves e foron trasladados ao Hospital Montecelo de Pontevedra tras verse implicados nun espectacular accidente de circulación rexistrado a última hora da noite deste domingo na parroquia de Mourente.
O sinistro produciuse na estrada N-541, á altura do lugar de Casasnovas, en Mourente. O Centro de Atención de Emerxencias de Galicia 112 recibiu a alerta ás 23.30 horas deste domingo.
Testemuñas presenciais explicaron que un turismo Opel Kadett de cor granate circulaba en dirección Bora-Pontevedra cando, á altura da farmacia de Casasnovas, en Mourente, se saíu da vía por motivos que se descoñecen e colisionou cun turismo de cor branca que se encontraba estacionado na marxe da calzada.
Tras o impacto, o turismo que estaba estacionado desprazouse cara á marxe contraria da calzada e bateu contra unha vivenda.
A consecuencia do accidente, ambos os dous vehículos sufriron aparatosos danos materiais e resultaron feridos os dous ocupantes do Opel Kadett, sempre segundo relataron testemuñas presenciais. Un deles tivo que ser excarcerado e ambos os dous foron trasladados en ambulancias medicalizada e asistencial do 061 a Montecelo.
Ao lugar do accidente trasladáronse varias dotacións dos Bombeiros de Pontevedra, as policías Local e Nacional, a Garda Civil e o 061. Pouco antes das 00.30 horas o lugar estaba xa despexado, pero foi necesario que Tráfico regulase a circulación mentres se procedía a limpar a calzada e a trasladar nun guindastre os vehículos sinistrados.