Seis cabalos á espera do seu dono
Por Redacción
A Policía Local de Marín tenta atopar á persoa propietaria de seis cabalos que aparecían durante a tarde do martes nunha leira situada na zona do Igrexario, na parroquia de Santa María de Ardán.
Os axentes subiron á rede social Facebook da Policía Local de Marín a fotografía cos animais e sinala que chegaron ata este espazo e provocaron algún dano na parcela.
O propietario da leira acoutou a zona para que os equinos non escapen e alertou aos axentes para tentar localizar a persoa propietaria coa intención de que responda polos danos.
Desde a Policía Local reclaman a colaboración cidadá para facilitar datos sobre a posible pertenza dos cabalos. Aquelas persoas que poidan ofrecer algunha pista poden chamar ao teléfono 092.