Os gardacostas requisan polbo, nécora e santiaguiño ilegal entre Cabicastro e Caneliñas, en Sanxenxo
Por Redacción
Axentes do Servizo de Gardacostas de Galicia, dependente da Consellería do Mar, realizaron nos últimos días distintas inspeccións na Ría de Pontevedra que se saldaron coa incautación de 189 nasas que estaban sen identificar e máis de 47 quilos de distintas especies de marisco.
Segundo a información facilitada pola Xunta de Galicia, boa parte desas nasas, 98, foron requisadas nunha inspección realizada entre Cabicastro e a praia de Caneliñas, en Sanxenxo, onde tamén se comisaron un total de preto de dez quilos de polbo, nécora e santiaguiño.
Na ría de Arousa os gardacostas realizaron varios controis que deron como resultado a incautación de 276 útiles, a maioría nasas, e máis de 217 quilos de distintas especies de peixe e marisco. Un dos controis máis destacados foi na Illa de Arousa, onde os gardacostas detectaron 170 nasas que estaban sen identificar e de 30 quilos de distintas especies de marisco.
En total, nos últimos días os gardacostas requisaron 1.654 útiles, unha embarcación, arredor de 340 quilos de distintas especies de peixe e marisco e 50 metros de artes de enmalle en diferentes controis realizados nos últimos días no litoral de Galicia.
A Consellería do Mar lembra á cidadanía que o consumo de produtos do mar extraídos e comercializados de xeito irregular pode supor un risco para a saúde ao non ter pasado ningún tipo de control que os avale. Por iso, pide aos consumidores que non merquen produto fóra das canles legais de comercialización.