Galicia reforza o seu apoio aos produtos frescos do mar
Por Redacción
A alerta sanitaria polo coronavirus provocou nos últimos meses que moitos profesionais do mar tivesen que facer un sobreesforzo para poñer a disposición dos mercados e da cidadanía produtos pesqueiros frescos da maior calidade.
Tratouse dunha situación excepcional como consecuencia das medidas aplicadas para evitar contaxios -que requiriron da adaptación de toda a cadea de produción e distribución- á que se sumaron os problemas derivados dos hábitos de compra dos consumidores, que pasaron a adquirir produtos para varios días, e que puxo de manifesto a necesidade de impulsar o consumo de produtos frescos do mar para que os profesionais do mar obtivesen mellores prezos polas súas capturas. Especialmente tendo en conta que a demanda baixou en gran medida como consecuencia do peche da hostalaría, un dos principais clientes do sector.
APOIO DA XUNTA
Co obxectivo de impulsar a demanda e os prezos dos produtos pesqueiros e agradecerlle ao sector o gran esforzo realizado durante a pandemia, a Xunta de Galicia puxo en marcha en abril a campaña de promoción do seu consumo Merca produto fresco do mar. Estamos no mesmo barco.
A través desta iniciativa a Consellería do Mar animaba e anima á cidadanía a consumir peixe e marisco por tratarse de produtos de calidade fundamentais para unha dieta saudable. Entre outros beneficios, aportan a vitamina D que normalmente se obtén do sol pero que non era posible acadar durante as semanas de confinamento.
A campaña tamén pretende agradecer o esforzo continuado do sector extractivo durante o estado de alarma para cumprir co seu papel de actividade esencial para o subministro de alimentos de calidade á sociedade e pide aos cidadáns permanecer no mesmo barco mediante o consumo de produtos do mar para impulsar a demanda e os prezos dos produtos pesqueiros.
Esta acción de promoción, que comezou en abril, lembra que mercar peixes e mariscos galegos supón apoiar ás arredor de 40 lonxas que seguiron abertas no momento máis duro da pandemia, ás máis de 10.000 mulleres e homes que continuaron saíndo cada día ao mar, ás praias ou ás bateas para poñer no mercado case 700 toneladas de distintas especies de gran calidade. A eles sumábanse as arredor de 2.000 embarcacións que seguían saíndo dos portos galegos a faenar a pesar da caída de ingresos.
ACCIÓNS NOS PUNTOS DE VENDA
Precisamente, co obxectivo de reforzar as accións de promoción e impulsar a demanda, o Executivo galego levou esta campaña tamén aos puntos de venda a través das principais cadeas de distribución. Por iso, a campaña Merca produto fresco do mar. Estamos no mesmo barco está presente desde maio nos puntos de venda galegos dos grupos Froiz, Gadisa, Carrefour, Vegalsa-Eroski e El Corte Inglés.
A situación excepcional vivida nos últimos meses demandaba medidas rápidas polo que a Consellería do Mar distribuíu 7.000 carteis, 7.000 vinilos e 24.000 letreiros de promoción que animan aos clientes destes establecementos a que merquen produtos pesqueiros para apoiar o esforzo realizado polos profesionais do mar.
Un labor que tivo a súa continuación co reparto de material informativo nas prazas de abastos e peixarías co obxectivo de meter a toda a sociedade no mesmo barco en apoio ao sector marítimo-pesqueiro.