A Xunta inicia as obras de mellora da depuradora dos Praceres
Por Oskar Viéitez
Augas de Galicia iniciou as obras de mellora do proceso de depuración da Estación Depuradora de Augas Residuais (EDAR) dos Praceres.
Esta actuación foi adxudicada á unión temporal de empresas Acciona Construcción, SA & Acciona Agua, SA, por un importe de preto de 13 millóns de euros. A intervención conta cun prazo de 24 meses, 12 para a execución da obra, ademais doutros 12 para a posta en marcha dos novos tratamentos.
A Consellería de Infraestruturas e Mobilidade, sinalou nun comunicado que o saneamento da ría de Pontevedra "é unha das grandes prioridades actuais en materia hidráulica, onde resulta imprescindible actuar para garantir tanto a recuperación ambiental das augas, a produtividade marisqueira e a actividade turística".
Esta actuación está cofinanciada pola Unión Europea a través do Fondo Europeo de Desenvolvemento Rexional (Feder) nun 80 %, no marco do programa operativo Feder Galicia 2014-2020.
Esta reforma tecnolóxica permitirá mellorar substancialmente a curto prazo a depuración das augas residuais dos concellos de Marín, Poio, Pontevedra e Vilaboa, co obxectivo de cumprir os límites de vertido marcados pola directiva europea.
A intervención contempla a remodelación do tratamento secundario existente, co fin de garantir a correcta depuración de ata 900 l/s de auga residual.
EMISARIO SUBMARINO
Esta actuación completarase coa construción dun novo emisario submarino, que permitirá unha mellor devolución das augas limpas á ría, dando cumprimento aos compromisos adquiridos coa Unión Europea. Este contrato foi adxudicado a principios de xuño á empresa Copasa por un importe superior os 10,1 millóns de euros.
A reforma da depuradora e a construción do novo emisario submarino forman parte do Plan de saneamento local elaborado tras un exhaustivo análise do actual sistema que foi dialogado cos concellos e os mariscadores da ría.
Ese plan inclúe a necesidade de acometer outras actuacións, entre elas a mellora das redes de saneamento municipais polas que se producen infiltracións indebidas.
Relacionadas:
-
Estriceres alerta do mal cheiro e o ruído que causa a reformada depuradora de Praceres
Por Redacción |
-
Augas de Galicia presiona o Goberno para desbloquear o proxecto do novo emisario submarino de Pontevedra
Por Redacción |
-
Entregan o novo colector e a estación de bombeo para recoller as augas residuais de Marín
Por Redacción |
-
RADIO.- Isto é o que Pontevedra descoñece sobre a covid-19 por non analizar as súas augas residuais
Por Marisa Ciordia |
-
O novo emisario submarino da depuradora de Praceres custará 10 millóns e estará listo en ano e medio
Por Redacción |
-
A Xunta estima que as obras de mellora da EDAR de Praceres comezarán en abril
Por Redacción |