Vilagarcía festexa este xoves o día de San Roquiño o Pequeno, a véspera da Festa da Auga
![Redacción](/web/cache/scene/uploads/xornalistas/foto/_S7QytKoutjK3UsovKMnMzytWsi62MjSxUqrKz891Lsov0DEyAC_/_Il61oA_/506490f5a15ce-c6ku5opwb5qbtijalxd0_reasonably_small.jpeg)
Por Redacción
Como cada 15 de agosto as festas de Vilagarcía céntranse no barrio de San Roque onde se celebrarán os tradicionais actos do día de San Roquiño o Pequeno. A misa na capela, a procesión polo barrio e a tradicional romaría poñen o inicio matutino á celebración que pola tarde se trasladará ao resto da vila e a discoteca móbil da explanada TIR na que os máis mozos poderán ir quentando motores de cara á celebración da Festa da Auga da mañá seguinte.
Os pasarrúas dos gaitas dos Terribles de Arousa pregoarán polo barrio de San Roque o Día de San Roquiño O Pequeno dende primeira hora da mañá. A misa celebrarase no praciña da capela de San Roque a partir das 11:30 horas e estará cantada pola Coral Santa Eulalia. Ao remate da mesma, celebrarase a tradicional procesión portando a imaxe do santo que se garda na capela e coa compaña da Banda de Música de Vilagarcía e Os Terribles de Arousa.
Unha vez concluído o percorrido, no mesmo atrio da capela, terá lugar a tradicional romaría popular co reparto de empanada e viño entre os asistentes, seguindo a tradición que rememora a costume que tiñan os donos do Pazo de San Roque de agasallar aos veciños do barrio para conmemorar o día de San Roquiño.
O programa das festas patronais segue tamén neste día festivo cunha xornada máis do Salón Gastronómico Vilagarcía, que abrirá as súas portas da Praza da Peixería de 12 a 15 horas e de 20 a 24 horas. Nela, os visitantes poderán degustar unha ampla carta de viños albariños de adegas da zona, así como pratos típicos.
Xa pola noite, a festa regresa ao barrio de San Roque onde, a partir das 22 horas, terá lugar a verbena amenizada polo grupo Os Tres Latinos e o Dúo Caramelo.
A diversión tamén está servida para os máis novos, na que é unha das noites máis longas do ano, a da previa á Festa da Auga. A oferta para a mocidade céntrase esta noite na explanada TIR onde se instalará unha discoteca móbil na que poderán bailar dende as 21:00 horas ata as 04:00 da mañá.