A primeira fin de semana da Peregrina xera 18 toneladas de lixo
Por Redacción
A coincidencia do fin de semana de inicio das Festas da Peregrina e o segundo fin de semana de touros e "peñas" en Pontevedra deixou un balance de 18 toneladas de lixo nas rúas da cidade.
Segundo os datos oficiais achegados pola concelleira de Festas, Carme da Silva, durante a madrugada e a mañá do domingo recolléronse 14 toneladas de lixo xerados durante todo o sábado. Este luns, a cantidade de residuos foi moi inferior, tan só catro toneladas. A diferenza entre ambos os dous días radica, fundamentalmente, en que o sábado houbo máis actos festivos e máis afluencia de persoas na rúa.
A edil Carme da Silva indicou que o total de 18 toneladas de lixo xerados supón dúas toneladas menos que na mesma fin de semana de 2012. A concelleira atribuíu este descenso a que a pesar de que houbo unha grande afluencia de xente na cidade os cidadáns son máis coidadosos e xeran menos residuos.
A primeira fin de semana de "peñas" deixou nas rúas de Pontevedra 14 toneladas de lixo, catro menos que na mesma fin de semana do ano 2012. Tras a celebración do sábado os operarios do servizo de limpeza recolleron nove toneladas e tras a festa do domingo, cinco.
A concesionaria do servizo de limpeza en Pontevedra, Cespa, reforzou o dispositivo especial de limpeza. A coincidencia co inicio oficial das Festas da Peregrina motivou a participación cada un dos días de seis traballadores máis, ata un total de 55, e a mobilización de 19 máquinas de diversa índole para manter en perfectas condicións de limpeza e hixiene o centro histórico da cidade, distribuíndo o operativo do seguinte xeito: 28 operarios a pé, tres sopradoras, sete varredoras, 3 lava-beirarrúas, 3 camións de recollida de lixo e tres cisternas.
O dispositivo divídese en catro sectores aos que se prestou especial atención: Campiño de Santa María, Praza do Teucro, Praza da Ferrería e o ámbito das atraccións das festas en Alameda, Raíña Vitoria e Palmeiras. Este operativo excepcional completouse co habitual servizo de limpeza e recollida no resto da cidade.