Ataque vandálico á mina que subministra auga a unha fonte no centro de Cuntis
Por Redacción
Ata próximo aviso, non se poderá coller auga na fonte da Praza das Árbores. A decisión adoptada polo goberno municipal está motivada polos actos vandálicos que se rexistraron na mina que subministra a este manancial.
O Concello lamenta "enerxicamente" o ataque sufrido pola mina e advirten que estes feitos "non van a quedar impunes".
Consideran que é un "feito moi grave" que atenta "directamente" contra a saúde dos veciños, polo que abrirán unha investigación para dar cos autores dos estragos.
Ante estes feitos e, por precaución, posto que o Concello descoñece se se puido verter algún produto no manancial, prohíbese durante todo o día de hoxe coller auga.
As autoridades municipais realizarán mañá unha analítica para coñecer a potabilidade e, de ser o caso, restablecer o uso público da fonte.