Inician os traballos de mantemento no roteiro de Ponte Sampaio
Por Redacción
O Concello de Pontevedra iniciou esta semana traballos de mantemento e reparación no roteiro de Ponte Sampaio, unha ruta natural creada en 2008 para poñer en valor o patrimonio etnográfico da parroquia.
As tarefas dos operarios municipais comezaron coa roza en varios lugares do sendeiro, invadidos pola maleza despois das continuas chuvias dos primeiros meses do ano.
Aproveitando os traballos o concelleiro delegado da parroquia, Demetrio Gómez, decidiu ademais habilitar unha nova ruta de 11,06 quilómetros que acurta a distancia a percorrer nas dúas xa existentes, de 14,6 e 12,35 quilómetros.
No mantemento inclúese a limpeza da canle do Paredón, un acueduto artesán que servía para regar os terreos próximos, ademais de proceder á sinalización do novo sendeiro.
O roteiro de Ponte Sampaio empeza e remata na ponte medieval, contando entre os seus elementos máis rechamantes o Cruceiro do Vilar, a capela de San Xosé ou a Illa de Medal, ademais de dispoñer de varios miradoiros con vistas á ría de Vigo.