'Peñistas' menos sucios que en 2012
Por Redacción
Os dous días de 'peñas' deixaron nas rúas de Pontevedra 14 toneladas de lixo, catro menos que na mesma fin de semana do ano 2012.
O voceiro do Goberno local, Raimundo González, ofreceu este luns un balance do primeiro fin de semana de feira taurina en Pontevedra e sinalou que tras a celebración do sábado os operarios do servizo de limpeza recolleron nove toneladas e tras a festa do domingo, cinco.
O verán pasado o primeiro sábado de 'peñas' deixara once toneladas e o primeiro domingo, sete. "Diminuiu a cantidade de lixo", valorou González Carballo, que interpretou que nesta redución puido influír que a festa coincidiu na Festa do Albariño de Cambados e coa Romaría Vikinga de Catoira.
A Concellaría de Servizos, que xestiona Carme da Silva, puxo en marcha esta fin de semana un servizo especial de limpeza en toda a zona monumental con motivo da festa que as peñas organizan nesta zona da cidade coincidindo coas touradas. A empresa Cespa, concesionaria do servizo de recollida de lixo e limpeza da cidade, creou un plan no que participarán 49 traballadores e 19 máquinas de diversa índole para manter en perfectas condicións de limpeza e hixiene o centro histórico da cidade.
A empresa Cespa destinou para este servizo extraordinario, cada un dos días de celebración de peñas, ata 49 operarios (un xefe de servizo, dous encargados, un xefe de taller e 45 operarios) que se dividiron a zona monumental en tres sectores: Campiño de Santa María, praza do Teucro e praza da Ferraría, cubrindo así todo o centro histórico.
A distribución do servizo será a seguinte: 22 operarios a pé, tres furgóns/sopladoras, sete varredoiras, tres lavabeirarrúas, tres camións de recollida de lixo (con dous operarios cada un) e tres cisternas.