Os hostaleiros de Pontevedra piden ao alcalde a supresión de taxas e asumen que o día 11 non poderán abrir
Por Manu Otero
Un dos sectores mais importantes para a economía e o emprego de Pontevedra e un dos máis golpeados pola crise do coronavirus é o hostaleiro. Representantes da Asociación de Hostaleiros e Empresarios de Pontevedra (Hoempo) reuníronse este martes co alcalde da cidade, Miguel Anxo Fernández Lores, para trasladarlle as inquietudes e demandas do colectivo para as próximas fases da desescalada.
A supresión dalgunhas taxas e a organización de actividades para promocionar o consumo na capital da provincia foron as principais peticións dos hostaleiros que, segundo o presidente da asociación, Víctor Pampín, o alcalde comprometeuse a estudar "e a colaborar porque lle preocupa a situación do sector", confesou.
Pola súa banda, o rexedor sinalou tras o encontro que "o Concello vai facer todo o posible para reactivar a economia, pero non podemos prometer cousas excesivamente porque temos limitacions económicas e competencias definidas".
A pesar da incerteza que rodea a todo o proceso de desescalada, o mandatario nacionalista asegurou que " imos adaptar as nosas competencias a estas circunstancias para sair dunha forma airosa en todos os sectores pero especialmente na hostalería e o turismo que é moi importante na cidade", explicou cifrando en 1.300 postos de traballo a capacidade empregadora do sector.
Sen chegar polo momento a ningún tipo de acordo, ambas as partes emprazáronse para un novo encontro que se fixará cando os técnicos municipais analicen as peticións dos hostaleiros e cando o novo marco legal estea máis definido.
O bo ambiente e ánimo de entendemento reinou durante unha reunión que durou preto de dúas horas. A principal petición dos empresarios referiuse á suspensión da taxa polas terrazas durante todo o 2020 xa que o negocio non vai ser rendible este ano, aseguran os empresarios.
Neste sentido, propuxeron tamén a ocupación dun maior espazo naqueles lugares nos que sexa posible, sen incrementar o número de mesas, para cumprir coas directrices de sanidade. E, finalmente, permitir excepcionalmente o uso de toldos frontais e laterais para os días de vento e choiva.
Suprimir a cobranza da taxa de recollida de lixo durante os meses nos que non fixeron uso do servizo é outra das peticións do colectivo.
Doutra banda e en sintonía cos plans do Concello, propoñen a organización de eventos que dinamicen o consumo na cidade. "Queremos reinventar todo tipo de actividade para xenerar movemento en todo ou que ten que ver coa ocupacion do espazo público, das festas, das actividades para nenos, ou eventos deportivos que non sexan masivas para que a xente volva as rúas", declarou Fernández Lores.
Con todo e a pesar de que os plans de desescalada permitirán retomar a actividade para partir do día 11 de maio, os plans dos hostaleiros pontevedreses pasan por manterse pechados. "Cada vez que abres hai uns gastos e por números case ninguén quere abrir. Tampouco temos claras aínda as garantías sanitarias", explica Pampín, cuxo sector se mantén actualizado a diario sobre os novos decretos do Goberno que afectan á súa actividade.
Algo que si lles consta son as ganas da clientela de retomar os costumes perdidos polo confinamento. "A xente ten necesidade de estar cos seus amigos e comunicarse, pero tamén sabemos que haberá que modificar os hábitos", asume o empresario.
Relacionadas:
-
Rafa Domínguez esixe transparencia de datos á área sanitaria e medidas económicas urxentes ao goberno de Lores
Por Anxo Lourido |
-
O Concello asesora aos hostaleiros para redistribuír as terrazas e ampliar ao máximo o número de mesas
Por Redacción |
-
Os hostaleiros alertan de terrazas masificadas e piden aos clientes que sexan responsables
Por Manu Otero |
-
Primeiro día de reapertura das terrazas: poucas abertas e cheas de xente
Por Redacción & Mónica Patxot |
-
Sanidade estuda se Pontevedra pasa á fase 1 da desescalada a partir do luns
Por Alejandro Espiño |
-
Comer entre mamparas de vidro
Por Alejandro Espiño |
-
Unha aplicación de reservas ou bonos de desconto, propostas para impulsar o turismo na cidade
Por Redacción |
-
Os hostaleiros queren apoio municipal para poñer en marcha un servizo "delivery"
Por Oskar Viéitez |
-
Os hostaleiros queren unha videoreunión co Concello para solicitarlle apoio ante os efectos da crise sanitaria
Por Redacción |
-
O Concello impulsará unha lanzadeira para o sector hostaleiro
Por Redacción |