Os bancos cualifican 'de alto risco' a operación inmobiliaria do Campo do Teucro
Por Oskar Viéitez
O tenente de alcalde e concelleiro de Urbanismo, Antón Louro, anunciou que a crise impide construir o estacionamento proxectado no Campo de Teucro.
Os promotores desta parcela de 13.000 metros, delimitada polas rúas Galera, Arcebispo Malvar, Fonte da Moureira e a avenida do Uruguai, comprendida na unidade de actuación número 5, renunciaron ao proxecto "debido á falta de financiamento" dado que os bancos entenden que "nestes momentos", esta operación inmobiliaria é cualificada como "de alto risco".
Os promotores desta iniciativa agrupados na Inmobiliaria Masar, proxectaban unhas 300 prazas de aparcadoiro en dúas plantas soterradas.
O estacionamento contaba co visto e prace do goberno municipal. Mesmo lograra salvar certos escollos ao quedar eximida da Avaliación Ambiental Estratéxica e ter aprobado polo Pleno municipal o proxecto de Plan Especial de reforma Interior (PERI).
O aparcadoiro iría baixo a praza pública e terá entrada e saída cara á avenida do Uruguai moi preto da ponte das Correntes.
A idea incluía a construción de 170 vivendas en bloques de tres e catro alturas.