Retiran máis de 422 quilos de residuos da praia da Lanzada
Por Redacción
A praia da Lanzada está hoxe máis limpa que hai uns días. É grazas á acción desinteresada dun grupo de 61 voluntarios que, o pasado sábado, retiraron 422,5 quilos de residuos do areal, situado no complexo intermareal Umia-O Grove, declarado zona de especial de conservación baixo a Rede Natura 2000.
A gran maioría dos obxectos recollidos durante a acción, 270,5 quilos, foron plásticos e envases, algúns de gran tamaño, como botellas, bidóns e outros recipientes similares, e outros máis pequenos como tapóns ou bastóns de algodón.
Tamén se retiraron 49 quilos de restos de artes de pesca e 97 quilos de residuos de materiais variados como madeiras tratadas ou restos metálicos. Os outros quilos de residuos eliminados do areal foron vidros -5,5 quilos- e produtos de papel ou cartón -0,5 quilos-.
A actividade estivo coordinada polo Grupo Naturalista Hábitat, a través dun programa ambiental impulsado por Abanca e Afundación.