Os socialistas esixen a Facenda que regularice a situación dos pensionistas emigrantes sen consideralos como defraudadores fiscais
Por Oskar Viéitez
O PSdeG insta a Xunta a que regularice a situación dos pensionistas emigrantes sen consideralos como defraudadores fiscais na súa campaña para esixir aos emigrantes retornados que tributen pola pensión que cobren do estranxeiro e esixe que se lles permita poñerse ao día con Facenda "sen multas nin sancións".
A deputada socialista, Carmen Gallego, informou este mércores nunha rolda de prensa celebrada en Pontevedra da proposición non de lei para o seu debate no Parlamento Galego e anunciou iniciativas similares no Congreso e o Senado.
Dende o pasado mes de marzo miles de pensionistas galegos que reciben pensións doutros paises europeos, están a ser notificados por Facenda para que presenten declaracións complementarias da renda dende o ano 2008.
Moitos xa recibiron varias notificacións e unha vez presentadas as declaracións complementarias empezaron a comunicarlles tamén sancións algo "absolutamente inmoral", cualificou a parlamentaria socialista.
Segundo Carmen Gallego "estamos ante reclamacións de pensións de paises como Alemaña, Suíza, Francia ou Bélxica, que en moitos casos están exentas de tributar nos países de onde proveñen pola súa contía".
Gallego asegurou que a estas reclamacións "se lles sumamos a complementaria e as sancións polo telas declarado no seu día poden chegar a cifras de 12.000 ou 15.000 euros, para as que Facenda dá uns prazos de devolución moi curtos e ademais con intereses".
"A vía xudicial en persoas de idade avanzada, con custos de avogados, procuradores, taxas xudiciais engadidas aos custos das sancións e declaracións complementarias non se revela como unha situación axeitada para estes casos", dixo Gallego.
Por un lado, indicou Carmen Gallego, a Adminsitración Autonómica "debe ofrecer información pormenorizada e homoxénea das súas obrigas fiscais". Así mesmo solicitan que se habiliten períodos de pagamento máis longos que os estipulados habitualmente, no caso de que teñan que afrontar pagamentos polas súas declaracións complementarias, "en prol de evitar un quebranto económico nas unidades familiares destes pensionistas".
Finalmente os socialistas galegos piden que se exima do pagamento de sancións e intereses de demora a aqueles pensionistas que regularicen as súas situación fiscal.
Carmen Gallego engadiu que o voceiro parlamentario do PSdeG, Abel Losada, e a parlamentaria Marisol Soneira xa trasladaron estas demandas ao delegado da Axencia Tributaria en Galicia.