Piden colaboración cidadá para localizar os donos de dúas bicicletas roubadas en Marín
Por Redacción
A Policía Nacional solicita colaboración cidadá para tratar de pescudar a quen pertencen dúas bicicletas intervidas polos axentes durante unha investigación.
Axentes da comisaría local de Marín identificaron un veciño da localidade con antecedentes policiais por varios delitos de danos e ameazas que orixinaron unha decena de intervencións policiais de diversa índole.
Segundo a información facilitada pola Policía Nacional, atribúenselle danos causados en distintos establecementos comerciais do centro da localidade que están valorados en case 2.000 euros.
Os axentes interviñeron ao presunto autor dos feitos dúas bicicletas cuxa propiedade ata o momento non se puido determinar, de modo que o Grupo de Policía Xudicial mantén abertas unha serie de xestións para a localización dos seus lexítimos propietarios nas que piden esa colaboración veciñal.