Espazo Feminista e Zeivas adiantan a manifestación do 8M en Marín por discrepancias co goberno municipal
Por Redacción
O Día Internacional da Muller, o próximo 8 de marzo, non se celebrará en Marín baixo a bandeira da unidade.
Espazo Feminista Marín e Colectivo Feminista Zeivas anunciaron o adianto da manifestación prevista con motivo do 8 M na localidade, e que pasará a celebrarse dous días antes, o 6 de marzo "en sinal de desconformidade coa decisión do goberno municipal de aglutinar nesta data conmemorativa outros actos alleos á causa propiamente feminista", sinalan nun comunicado.
Refírense en concreto a unha serie de actividades lúdicas, gastronómicas e deportivas incluídas na programación da xornada.
Segundo estas asociacións a postura do Concello "responde a unha manobra para desmobilizar á veciñanza e restarlles poder de convocatoria ás organizacións feministas, desvirtuando a significación reivindicativa do Día da Muller en materia de dereitos sociais".
Este ano, a nivel local, o 8M está dedicado ás mulleres coidadoras, co obxectivo de recoñecer e visibilizar o seu labor.
Ambos os dous colectivos feministas aseguran que contan co respaldo das asociacións de mulleres a nivel comarcal integradas na Plataforma Galegas 8M garantindo a súa participación na manifestación que se celebrará neste caso en Marín o día 6 de marzo.