Un accidente en Vilariño entre un turismo e unha furgoneta causa tres feridos
Por Redacción
Ao redor das 19.00 horas deste luns 6 rexistrábase un accidente de tráfico entre un turismo e unha furgoneta na VG-4.3 á altura da rotonda de Vilariño, no municipio de Cambados.
Segundo a información facilitada polo Servizo de Emerxencias o impacto saldábase con tres persoas feridas, que foron evacuadas ao Hospital do Salnés.
As dúas persoas ocupantes da furgoneta, de 40 e 53 anos de idade, sufrían dor cervical. No turismo que ocasionou o accidente, o copiloto, un mozo de 26 anos, foi trasladado con dor cervical e lumbar.
O carril en sentido a Vilagarcía estivo cortado durante unha hora e a Policía Local de Cambados dirixiu o tráfico nesta vía ata que chegaron os efectivos da Garda Civil de Tráfico.