A Praza da Ferraría, moi pronto máis accesible e sen barreiras arquitectónicas
Por Redacción
A Praza da Ferraría será un entorno máis accesible moi pronto. O Concello de Pontevedra inicia este mércores os traballos de eliminación de barreiras arquitectónicas nas rúas perimetrais da praza.
Os traballos consistirán na colocación do pavimento a nivel da praza, eliminando as barreiras arquitectónicas no Paseo Odriozola ata o seu entronque coas rúas Laranxo e Pasantería e que se prolongará ata a rúa San Román. Ademais da renovación do pavimento tamén está prevista a renovación dos servizos de gas, electricidade, telecomunicacións ou auga.
Dos 170.000 euros de custe do proxecto, o Concello fai unha achega de 100.000 euros e o resto procede dunha subvención concedida polo Imserso e a ONCE. Pero as pretensións municipais ao respecto da Ferraría eran máis ambiciosas. O proxecto inicial supoñía a reposición de todo o enlousado da praza, pero a axuda dos organismos estatais quedou en 70.000 euros polo que o Concello acordou rebaixar a actuación e limitala á eliminación das barreiras da praza.
A última reforma que se fixo na Praza da Ferraría foi no ano 1986, cando se repuxo toda a pedra da praza procedente de derrubes do porto de Marín. Esta pedra tiña moitos danos e estaba afectada pola salitre, polo que rompe con certa facilidade.